Ky dokument paraqet përmbushjen e hapit të Agjendës së Reformave për përfundimin e digjitalizimit të të gjitha kartelave në letër të pasurive të paluajtshme, në përputhje me Udhërrëfyesin Gjithëpërfshirës për Digjitalizimin e të Dhënave Kadastrale. Procesi u zbatua nga Agjencia Shtetërore e Kadastrës (ASHK) dhe mundësoi transformimin e plotë të regjistrave kadastralë nga dokumente fizike në një sistem të integruar elektronik.
Në përfundim të procesit janë digjitalizuar dhe integruar në bazën elektronike të të dhënave të ASHK-së 4,330,986 kartela të pasurive të paluajtshme, të cilat tashmë përdoren si burimi zyrtar për ofrimin e shërbimeve kadastrale. Procesi është shoqëruar me kontrolle të plota të cilësisë, verifikimin e të dhënave me dokumentacionin origjinal dhe krijimin e gjurmueshmërisë ndërmjet arkivit fizik dhe regjistrit elektronik, duke forcuar efikasitetin, sigurinë dhe transparencën e administrimit të pronës.