Në kuadër të reformës së derregullimit dhe përmirësimit të klimës së biznesit, Qeveria Shqiptare ndërmori një paketë të gjerë ndryshimesh ligjore dhe nënligjore për thjeshtimin e procedurave administrative, reduktimin e barrës burokratike dhe zgjerimin e përdorimit të shërbimeve elektronike. Gjatë vitit 2024 u miratuan 27 akte ligjore dhe nënligjore, përfshirë ligje, vendime të Këshillit të Ministrave, udhëzime dhe urdhra ministrorë, të cilat synojnë të reduktojnë dokumentacionin e kërkuar, të përshpejtojnë procedurat dhe të rrisin aksesin e bizneseve në shërbimet publike përmes platformave dixhitale. Kjo reformë kontribuon në krijimin e një mjedisi më transparent, më efikas dhe më të favorshëm për investimet dhe zhvillimin e sipërmarrjes në Shqipëri.