Ky dokument paraqet përmbushjen e hapit të Agjendës së Reformave për krijimin e kuadrit kombëtar për identifikimin, monitorimin dhe adresimin e varfërisë energjetike në Shqipëri. Me miratimin e Planit Kombëtar të Veprimit për Trajtimin e Varfërisë Energjetike dhe Mbrojtjen e Konsumatorëve Vulnerabël të Energjisë Elektrike 2026–2030, si dhe metodologjisë për identifikimin dhe monitorimin e varfërisë energjetike, u krijua baza strategjike dhe metodologjike për hartimin dhe zbatimin e politikave publike në këtë fushë.
Metodologjia përcakton kriteret për identifikimin e familjeve në varfëri energjetike, bazuar në treguesit socio-ekonomikë, shpenzimet për energjinë dhe performancën energjetike të banesave, duke përdorur metodologjinë Low-Income High-Costs (LIHC) dhe indikatorë të Bashkimit Evropian dhe Komunitetit të Energjisë. Plani i Veprimit parashikon masa për mbrojtjen e konsumatorëve vulnerabël, përmirësimin e efiçencës së energjisë në banesa, krijimin e Regjistrit Kombëtar të Varfërisë Energjetike dhe forcimin e koordinimit ndërinstitucional, në përputhje me legjislacionin dhe politikat evropiane për energjinë.