Ky dokument paraqet përmbushjen e hapit të Agjendës së Reformave për harmonizimin e legjislacionit shqiptar me Paketën e Integrimit të Tregut të Energjisë Elektrike, në përputhje me kërkesat e Komunitetit të Energjisë. Me miratimin e Ligjit Nr. 59/2026 “Për Sektorin e Energjisë Elektrike”, Shqipëria krijoi një kuadër të ri ligjor që përafron legjislacionin kombëtar me direktivat dhe rregulloret kryesore të Bashkimit Evropian për tregun e brendshëm të energjisë elektrike.
Ligji vendos bazën për integrimin e tregut shqiptar me tregun rajonal dhe evropian të energjisë elektrike, duke përfshirë zhvillimin e mekanizmave të bashkimit të tregjeve (market coupling), rritjen e rolit të konsumatorëve, magazinimin e energjisë, agregimin, menaxhimin e kërkesës, infrastrukturën për automjetet elektrike dhe forcimin e bashkëpunimit rajonal. Reforma mbështet modernizimin e sektorit energjetik, rrit konkurrencën dhe sigurinë e furnizimit me energji dhe përshpejton integrimin e Shqipërisë në tregun evropian të energjisë elektrike.