Ky dokument paraqet përmbushjen e hapit të Agjendës së Reformave për harmonizimin e legjislacionit shqiptar me Direktivën (BE) 2018/2001 për energjinë nga burimet e rinovueshme (RED II) në fushën e biokarburanteve, biolëngjeve dhe lëndëve djegëse nga biomasa. Përmes miratimit të Ligjit Nr. 46/2025 “Për Biokarburantet në Transport” dhe akteve nënligjore zbatuese, Shqipëria krijoi kuadrin ligjor dhe operacional për garantimin e qëndrueshmërisë së biokarburanteve dhe reduktimin e emetimeve të gazeve serrë.
Kuadri i ri përcakton kriteret e qëndrueshmërisë dhe kursimit të emetimeve të gazeve serrë, procedurat e verifikimit dhe certifikimit, metodologjitë për llogaritjen e energjisë së rinovueshme në transport, si dhe krijimin e bazës kombëtare të të dhënave dhe regjistrit të karburanteve të rinovueshme për transport. Reforma forcon përdorimin e karburanteve të qëndrueshme në sektorin e transportit dhe harmonizon legjislacionin shqiptar me standardet e Bashkimit Evropian për energjinë e rinovueshme.