Ky dokument paraqet përmbushjen e hapit të Agjendës së Reformave për harmonizimin e legjislacionit shqiptar me Rregulloren (BE) 2020/1056 mbi Informacionin Elektronik të Transportit të Mallrave (eFTI). Me miratimin e Ligjit Nr. 60/2026 “Për Informacionin Elektronik të Transportit të Mallrave”, Shqipëria krijon bazën ligjore për shkëmbimin elektronik të informacionit rregullator ndërmjet operatorëve ekonomikë dhe autoriteteve kompetente në transportin e mallrave.
Ligji përcakton detyrimin e autoriteteve për të pranuar informacionin e transportit në format elektronik përmes platformave të certifikuara eFTI, si dhe përcakton institucionet përgjegjëse për administrimin, verifikimin dhe monitorimin e sistemit. Ky hap kontribuon në modernizimin e sektorit të transportit, uljen e barrës administrative, rritjen e efikasitetit të procedurave dhe përafrimin e mëtejshëm të kuadrit ligjor shqiptar me acquis të Bashkimit Evropian.