Ky dokument paraqet përmbushjen e hapit të Agjendës së Reformave për krijimin e një kuadri të plotë ligjor dhe institucional për shkencën, kërkimin shkencor dhe inovacionin, në përputhje me politikat e Zonës Evropiane të Kërkimit (European Research Area – ERA). Me miratimin e Ligjit Nr. 109/2024 dhe paketës së akteve nënligjore zbatuese, Shqipëria krijoi për herë të parë një sistem të integruar që rregullon organizimin, financimin, monitorimin dhe vlerësimin e kërkimit shkencor, duke vendosur standarde për qeverisjen, integritetin shkencor, shkencën e hapur dhe zhvillimin e karrierës së kërkuesve shkencorë.
Kuadri i ri përcakton mekanizma për financimin konkurrues të projekteve kërkimore, vlerësimin e performancës së institucioneve dhe kërkuesve shkencorë, krijimin e Qendrave të Ekselencës, regjistrin kombëtar të institucioneve dhe kërkuesve shkencorë, si dhe zbatimin e parimeve të shkencës së hapur. Reforma forcon ekosistemin kombëtar të kërkimit dhe inovacionit, rrit transparencën dhe cilësinë e kërkimit shkencor dhe mbështet integrimin e Shqipërisë në programet dhe iniciativat e kërkimit të Bashkimit Evropian.